M A F U N Z O YA COMPUTER

MAFUNZO YA COMPUTER

TUNAFUNDISHA WANAFUNZI WALIOMALIZA KIDATO CHA NNE KATIKA KOZI ZA COMPUTER, NJOO UJIFUNZE COMPUTER KATIKA LEVEL YA JUU KWA GHARAMA NAFUU.

PIA TUNASAJILI WANAFUNZI WANAOHITAJI KWENDA CHUO

F:0654673636/ 0767673636

**TUNAPATIKANA MERIDIAN PRINTING MAJENGO SHINYANGA**

HUDUMA NYINGINE TUNAZOTOA TUNATENGENEZA COMPUTER, WINDOWS, PROGRAM, DATA SETUP, NETWORKING, TCP/ IP PROTOCOL, SQL DATABASE, SPSS, ADOBE, programming in C#, .Net, Java and PHP , CCNA, MCITP, LINUX, Graphic Design,TALLY, hardware/ software, web design,AppLICATION,TEACHING COMPUTER, MAINTENANCE & REPAIR, EXCEL, ACCESS, DATA SETUP & EDITING AINA ZOTE

WANAFUNZI

Read More

TAARIFA KWA UMMA KUHUSU UTEUZI WA AWAMU YA NNE, UHAMISHO NA KUONGEZWA KWA MUDA WA KUFANYA MAOMBI KATIKA KOZI ZA ASTASHAHADA (CHETI) NA STASHAHADA (DIPLOMA) KWA MWAKA WA MASOMO 2016/2017

Baraza la Taifa la Elimu ya Ufundi (NACTE) linapenda kuwaarifu Waombaji wote walioomba kudahiliwa katika kozi za Astashahada (Cheti) na Stashahada (Diploma) na Umma kwa ujumla kuwa dirisha la maombi lilifungwa mnamo tarehe 15 Oktoba 2016 ili kuruhusu uteuzi wa awamu ya nne kwa waombaji wa kozi hizo.

---

Uteuzi wa awamu ya nne kwa waombaji wa Astashahada na Stashahada unatarajiwa kutangazwa mnamo tarehe 2 Novemba 2016, hivyo basi waombaji wanaombwa kuwa na subira ili kutoa muda kwa Baraza kukamilisha taratibu za uteuzi huo.

---

Maombi mapya ya Udahili:

Baraza linapenda kutoa taarifa kuwa Mfumo wa Pamoja wa Udahili (CAS) utafunguliwa tena tarehe 2 Novemba 2016 hadi tarehe 6 Novemba 2016 ilikujaza nafasi za udahili zilizobaki wazi baada ya uchaguzi wa awamu ya nne. Hatua hii itawezesha kuruhusu machaguo mapya kwa wale ambao hawakuchaguliwa katika kozi walizoomba pamoja na kuruhusu waombaji wapya ambao kwa njia moja au nyingine hawakuweza kuomba hapo awali.

---

Maombi ya Uhamisho:

Mwombaji aliyechaguliwa ataweza kuomba uhamisho kutoka chuo ama kozi moja kwenda nyingine kupitia kwenye ukurasa wake binafsi (profile) tu. Uhamisho huu utategemea nafasi zilizopo, ushindani na alama za chini za kujiunga na kozi (cut-off). Orodha ya Vyuo na Programu zenye nafasi inapatikana hapa

---

Hatua za kuomba uhamisho:

1. Ingia kwenye ukurasa wako binafsi (profile) kwa kutumia jina la mtumiaji (Username) na neno la siri (Password) ulivyopewa wakati wa usajili
2. Bofya kitufe kilichoandikwa “Transfer Request/Kuomba Uhamisho”, na punde ukurasa utafunguka
3. Utafunguka ukurasa unaokuonesha chuo na kozi uliyochaguliwa awali
4. Chagua kada unayohitaji kuhamia
5. Chagua chuo unachohitaji kuhamia
6. Chagua kozi unayohitaji kuhamia
7. Mfumo utatathmini kama una sifa za kujiunga na kozi uliyochagua. Iwapo una sifa za kujiunga na kozi hiyo mfumo utakuomba ulipie Sh. 30,000/- kama ada ya maombi ya uhamisho. Kiasi hiki hakitarudishwa (non-refundable)
8. Bofya kitufe kilichoandikwa “Confirm Transfer Request/Kamilisha Maombi”.
9. Utapewa muhtasari wa maombi yako ya uhamisho pamoja na kutumiwa ujumbe mfupi wa maandishi kwenye namba ya simu ya mkononi uliyoweka wakati wa usajili na barua pepe kukujulisha kwamba umekamilisha maombi.

---

Jinsi ya kulipia (Malipo ya tafanywa kwa M - pesa tu):

1. Piga *150*00#
2. Chagua 4. LIPA kwa M-Pesa
3. Chagua 4. Weka namba ya kampuni
4. Tafadhali weka namba ya kampuni (No. 607070)
5. Weka namba ya kumbukumbu ya malipo (No. 1234)
6. Weka kiasi (e.g. 30,000/=)
7. Weka namba ya siri
8. Bonyeza 1 kuthibitisha.

---

Angalizo (Disclaimer):

1. Kuhama chuo na kozi si lazima.
2. Uhamisho utafanyika kwa kozi zile tu zenye nafasi na kwa vyuo ambavyo bado havijafunguliwa na kuanza masomo.
3. Uhamisho ni kwa wale waombaji waliokwisha kuchaguliwa kupitia mfumo wa pamoja wa udahili tu.
4. Maombi ya uhamisho yanaweza kufanyika MARA MOJA na kwa kozi moja
5. Iwapo umefanikiwa kupata uhamisho, majibu yataonekana kwenye ukurasa wako binafsi (Profile). Majibu haya pia yatatumwa kwenye namba yako ya simu kwa njia ya ujumbe mfupi wa maandishi na kupitia barua pepe baada ya tarehe ya mwisho ya maombi (6 Novemba 2016).
6. Uhamisho utategemea ufaulu wa waombaji na nafasi zilizopo. Hii inamaanisha kwamba wenye ufaulu wa juu ndio wenye uwezo mkubwa wa kukubaliwa kuhama.
7. Maombi yatakayotumwa kwa barua au barua pepe hayatoshughulikiwa.
8. Waombaji waliomba uhamisho na kukosa awamu iliyopita wataruhusiwa kuomba tena bila malipo mapya.

---

Imetolewana

Ofisiya Katibu Mtendaji

Baraza laTaifa la Elimu ya Ufundi (NACTE)

Tarehe: 1 Novemba, 2016

Read More

Mke wa Lema aunganishwa kesi ya kumtusi RC Arusha

MKE wa Mbunge wa Jimbo la Arusha Mjini, Godbless Lema, Neema Lema (33) amefikishwa katika Mahakama ya Hakimu Mkazi Arusha na kuunganishwa katika kesi ya mume wake ya kumtukana Mkuu wa Mkoa wa Arusha, Mrisho Gambo kuwa ni shoga.
Akimsomea mashitaka hayo kwa mara ya kwanza, Wakili wa Serikali, Blandina Msawa mbele ya Hakimu Augustino Rwezile, alidai kuwa kati ya Agosti 20, mwaka huu ndani ya Arusha, Neema ambaye ni mkazi wa Njiro alimtumia ujumbe wa simu ya kiganjani mkuu huyo wa mkoa wenye lugha ya matusi, huku akijua ni kosa kisheria.
Alidai mtuhumiwa huyo alituma ujumbe kutoka namba 0764 150 747 na 0756 551 918 kwenda namba 0766 757 575 uliokuwa ukidai, “Karibu, tutakudhibiti kama Uarabuni wanavyodhibiti mashoga.”
Mshitakiwa alikana shitaka hilo na yupo nje kwa dhamana hadi Novemba 15, mwaka huu itakapotajwa tena kesi hiyo.

Read More

DC ataka Mwalimu Mkuu Mwananyamala kushushwa cheo

MKUU wa Wilaya ya Kinondoni, Ally Hapi amemuagiza Mkurugenzi Mtendaji wa Manispaa hiyo, Aron Kagurumjuli kumshusha cheo Mwalimu Mkuu wa Shule ya Msingi Mwananyamala B, Emmanuel Temba kwa makosa mbalimbali, ikiwemo kufanya biashara shuleni.
Akitoa agizo hilo katika ziara ya kutembelea kata za manispaa hiyo jana, Hapi alisema ametoa adhabu hiyo kwa kosa la kufanya biashara ya vibanda shuleni hapo wakati agizo la serikali lililotolewa mwaka 2006, haliruhusu biashara shuleni.
‘’Huyu mwalimu mkuu wa shule hii, hatufai haiwezekani afanye biashara ya vibanda shuleni wakati serikali ilishakataza huku akiwaruhusu wafanyabiashara kutumia vyoo vya watoto wetu wanaosoma hapa, na kuagiza mkurugenzi mvue cheo huyu mwalimu,” alisema Hapi.
Aidha, Hapi alisema kosa lingine linalomkabili Temba ni kuruhusu wafanyabiashara wa vibanda hivyo kutumia vyoo vya wanafunzi vilivyopo shuleni hapo, ikiwa ni pamoja kuweka kituo cha kuuza mafuta ya taa katika eneo la shule. Hapi alitoa agizo hilo huku mwalimu mkuu huyo akiwa hayupo shuleni hapo, na taarifa zilidai alienda kwenye msiba wa kaka yake.
Mkuu huyo wa wilaya alitembelea pia Soko la Mwananyamala Kisiwani ambako aliagiza ujenzi wa soko hilo uliosimama kwa muda mrefu uanze.
“Hili soko haiwezekani fedha zimeshatolewa na Halmashauri, lakini ujenzi mpaka leo haujaisha, nawapa wiki mbili ujenzi uanze mara moja,” alisema.

Read More

Watumishi changamkieni ununuzi wa nyumba-RC

WATUMISHI wa umma wameshauriwa kuchangamkia fursa ya kununua nyumba zilizojengwa na Wakala wa Majengo nchini (TBA) kabla ya muda wa kustaafu ili kujitengenezea maisha mazuri baada ya kustaafu.
Hayo yalisemwa jana jijini Dar es Salaam na Mkuu wa Mkoa wa Dar es Salaam, Paul Makonda wakati alipotembelea nyumba za watumishi zilizojengwa na Wakala wa Majengo (TBA) zilizopo eneo la Bunju na nyumba za wananchi Magomeni Kota.
Makonda alisema watumishi wengi amekuwa wakiishi maisha ya tabu baada ya kustaafu kutokana na kutojipanga kabla ya kustaafu na gharama za maisha kupanda, lakini kupitia ujenzi wa nyumba hizi wanaweza kupata nyumba hizo kwa gharama nafuu.
“Tumeona hapa kuna nyumba za kima cha chini cha shilingi milioni 38 unaweza ukajipanga ukakopa nyumba na kulipa taratibu hata pale utakapostaafu unakuwa na nyumba yako na familia yako na kuishi bila tabu,” alisema Makonda.

Read More

Tanzania yaipa somo ICC kukabili mpasuko

WAKATI nchi kadhaa za Afrika zikionesha dalili za kutaka kujiengua kutoka Mahakama ya Kimataifa ya Makosa ya Jinai (ICC), Tanzania imeishauri mahakama hiyo kukaa meza moja na nchi wanachama wa Mkataba wa Roma, hasa za Afrika ili kutafuta suluhu ya changamoto na tofauti zilizopo kati ya mahakama hiyo na wanachama wake.
Imetoa mwito huo mwanzoni mwa wiki hii kupitia Mwakilishi wake wa Kudumu katika Umoja wa Mataifa (UN), Balozi Tuvako Manongi wakati Baraza Kuu la Umoja wa Mataifa lilipopokea na kujadili taarifa ya utendaji wa ICC. Alisema uwepo au kuanzishwa kwa ICC kulitokana kwa kiasi kikubwa na uungwaji mkono kutoka nchi za Afrika.
Alisema uungwaji mkono huo ulisababishwa na namna nchi hizo za Afrika zilivyokatishwa tamaa na kuvunjika moyo baada ya kutokea kwa mauaji ya kimbari nchini Rwanda.
“Baada ya kukatishwa tamaa na kuvunjwa moyo, mahakama hii, ilikuja kuwa chombo cha kutenda haki dhidi ya watu waliojihusisha na vitendo vya kikatili vikiwamo vya ukatili dhidi ya binadamu, uhalifu wa kivita na ukiukwaji mkubwa wa haki za binadamu,” alisema Balozi Manongi.
Alisema kutokana na madhara makubwa yasiyoelezeka yaliyotokea Afrika yaliifanya mahakama hiyo kuwa chombo cha matumaini dhidi ya wale ambao hawakuweza kuguswa au walikuwa juu ya sheria.
“Tanzania inatambua kuwa uhusiano kati ya mahakama hii na Afrika ni ule wa misuguano, na ni uhusiano ambao umeleta hofu ya Afrika kujitoa,” alisema na kuongeza kuwa hofu hiyo ya kujitoa kwa Afrika katika mahakama hiyo, haipaswi kuwepo kutokana na mambo kadhaa ambayo Afrika imejipanga kuyatekeleza kwa manufaa ya bara hilo na watu wake.
Aliyataja mambo hayo kuwa ni utekelezaji wa ajenda ya Maendeleo ya Umoja wa Afrika maarufu kama agenda 2063 ambayo pamoja na mambo mengine inachagiza katika utawala bora, demokrasia, usawa wa jinsia, kuheshimu haki za binadamu, haki na utawala wa sheria.
“Viongozi wa wakuu wa nchi na serikali wa Afrika wameutangaza mwaka 2016 kuwa mwaka wa haki za binadamu huku mkazo ukielekezwa katika haki za wanawake. Na katika kutambua kuwa Amani na Haki ni vitu visivyoweza kutenganishwa, kwa sababu hizo, tunachotakiwa kuhimiza leo sana sana ni majadiliano,” alisisitiza.
Pamoja na hayo, Tanzania imelitaka Baraza la Usalama la Umoja wa Mataifa, kutopeleka ICC rufaa zenye mlengo wa kisiasa, kwani kwa kufanya hivyo kunachangia kuharibu sifa ya ICC na kuifanya isiaminiwe na kuonekana inatumiwa na wakubwa kutimiza malengo yao.
Taarifa ya ICC iliwasilishwa na Rais wa mahakama hiyo, Jaji Silvia Fernandez de Gurmendi katika kipindi ambacho Jumuiya ya Kimataifa imekumbwa na taharuki baada ya wanachama wawili Afrika Kusini na Burundi kuwasilisha rasmi UN kusudio la kujiondoa huku Gambia nayo ikitangaza kutaka kujitoa ingawa haijawasilisha rasmi nia yake hiyo.

Read More

Shein ahimiza mikutano ya watendaji kutatua kero

RAIS wa Zanzibar na Mwenyekiti wa Baraza la Mapinduzi, Dk Ali Mohamed Shein ameeleza umuhimu wa viongozi katika Ofisi na Idara za Serikali kuwa na utaratibu wa kufanya mikutano mara kwa mara na watendaji wao ili kuzungumza na kujadili masuala yao ya kazi.
Dk Shein aliyasema kuwa hatua hiyo itasaidia kwa kiasi kikubwa kujua matatizo ya watendaji wao pamoja na kukaa kwa pamoja kwa lengo la kujadili na kuzitafutia ufumbuzi changamoto zilizopo kwa haraka na hatimae kuweza kufanya kazi kwa ufanisi zaidi.
Aliyasema hayo jana Ikulu mjini Zanzibar katika kikao maalumu kati yake na uongozi wa Ofisi ya Rais, na Mwenyekiti wa Baraza la Mapinduzi, wakati ilipowasilisha Taarifa ya Utekelezaji wa Mpango Kazi kwa kipindi cha Julai hadi Septemba katika Bajeti ya mwaka 2016-2017 ya ofisi hiyo.
Katika maelezo yake, alisema ni jukumu kwa kila mkuu wa Idara kuwa na utaratibu huo kwani utasaidia kwa kiasi kikubwa kupata maamuzi ya haraka sambamba na kuweza kufanya kazi kwa pamoja hatua ambayo pia, hupunguza mivutano na hujenga mafahamiano makubwa.
Aidha, alieleza kuwa kukaa pamoja kati ya kiongozi na watendaji wake kunasaidia kwa kiasi kikubwa kufikia muwafaka katika kujadili masuala mbali mbali ya kiutendaji hali ambayo huzidisha mshikamano na kujenga udugu miongoni mwao.
Aidha, alitumia fursa hiyo kutoa pongezi kwa uongozi na watendaji wote wa Ofisi ya Rais na Mwenyekiti wa Baraza la Mapinduzi kwa utendaji wao wa kazi sambamba na kazi nzuri ya uwasilishaji na utekelezaji wa Mpango Kazi uliofanywa na Ofisi hiyo.
Mapema Waziri wa Nchi Ofisi ya Rais na Mwenyekiti wa Baraza la Mapinduzi, Issa Haji Ussi Gavu akisoma taarifa ya Mpango Kazi wa Ofisi hiyo, na kusema kuwa Ofisi ya Rais imedhamiria kuwaunganisha wananchi wa Zanzibar ili waishi kwa amani, mshikamano na upendo miongoni mwao.

Read More

Songwe wakamata mbegu feki za mahindi

POLISI katika Mkoa wa Songwe wamekamata kilogramu 455 za mbegu zinazoaminika kuwa feki za mahindi katika msako mkali unaoendelea kwa ushirikiano na Kampuni ya Mbegu ya Pana.
Kadhalika, watu watano wanashikiliwa na Polisi kutokana na kujihusisha na biashara hiyo ya kuuza mbegu hizo na uchunguzi dhidi yao unaendelea kufanyika.
Miongoni mwa maeneo ambayo msako umeendeshwa ni Mji Mdogo wa Mlowo wilayani Mbozi ambako ndiko zimekamatwa mbegu hizo za mahindi.
Mwenyekiti wa Kamati ya Ulinzi na Usalama ya Mkoa wa Songwe, Mkuu wa mkoa huo, Chiku Galawa amebainisha hayo alipozungumza na waandishi wa habari ofisini kwake jana baada ya kukamatwa kwa mbegu hizo feki kuwa serikali mkoani hapa imejipanga kuhakikisha wauzaji pembejeo feki wote wanakamatwa na kuchukuliwa hatua za kisheria kwa kuwaumiza wakulima.
Hata hivyo, Galawa aliwataka wananchi kutoa ushirikiano mkubwa kwa jeshi la polisi ili kuwafichua watu wanaojihusisha na biashara hiyo ili wakamatwe na kufikishwa katika vyombo vya sheria kwani wanachangia kudidimiza mapato ya mkulima kwa asilimia 80.

Read More

Uvuvi haramu ‘huyeyusha’ matumbawe

MAKAMU wa Rais mstaafu, Dk Mohammed Gharib Bilal ameonya kuwa uvuvi wa haramu unaofanywa na wavuvi katika maeneo ya pwani ya bahari ya Hindi unatishia kutoweka kwa matumbawe, jambo ambalo lina madhara makubwa ya kimazingira kwa nchi.
Akitoa mhadhara katika kongamano la mazingira na mabadiliko ya tabianchi lililoandaliwa na kigoda cha Mwalimu Nyerere cha Chuo Kikuu cha Dar es Salaam, Dk Bilal alisema kitendo cha kuendesha uvuvi haramu kunaharibu matumbawe ambayo yana umuhimu makubwa katika fukwe na viumbe vingine vya baharini.
Dk Bilal alisema kama hatua za haraka hazitachukuliwa kudhibiti uvuvi haramu wa kutumia baruti, janga kubwa la kimazingira litatokea na hivyo kuathiri shughuli za kiuchumi na ustawi wa jamii, kwa vile matumbawe hivi sasa yana faida kubwa katika nyanja hizo.
Katika mhadhara wake, Dk Bilal alisema uchafuzi wa mazingira kwa sasa unatisha kutokana na watu wengi kutaka kutumia vyanzo vya mapato kwa kuharibu mazingira, hivyo akasema kuna haja ya wadau wote kuunganisha nguvu kukomesha athari za uhabirifu wa mazingira.
“Natoa mwito kwa wananchi wote, wawe wasikivu kwa ushauri unaotolewa na wataalamu wetu wa Mazingira, tusipochukua tahadhari ya kutunza mazingira vizazi vijavyo vitapata shida,” alisema Dk Bilal na kusisitiza kuwa uvuvi huo haramu unakimbiza samaki, lakini pia unaathiri maisha ya watu ambao uchumi wao unategemea rasilimali za baharini.
Katika hotuba yake, pia makamu huyo wa rais mstaafu alitaka kukomeshwa ukataji wa mikoko kwani kufanya hivyo kunatishia uhai wa miti hiyo ambayo huzuia kasi ya maji ya bahari kuvamia nchi kavu. Alisisitiza kuwa ukataji wa mikoko una athari kubwa kwa nchi kwani unasababisha mafuriko na mmonyoko wa udongo katika maeneo ya pwani ya bahari.
Kongamano hilo la siku tano linahusisha washiriki kutoka nchi mbalimbali ambao wanajadili namna ambavyo Afrika inaweza kupambana na athari za mabadiliko ya nchi. Kongamano hilo lilifunguliwa juzi na Makamu wa Rais, Samia Suluhu Hassan ambaye alitaka wananchi wakomeshe vitendo vya uharibifu wa mazingira.

Read More

Mashali kuagwa Leaders leo

MWILI wa bondia wa ndondi za kulipwa nchini, Thomas Mashali aliyeuawa Kimara jijini Dar es Salaam usiku wa kuamkia Jumatatu, utazikwa leo kwenye makaburi ya Kinondoni.
Baba mzazi wa marehemu, Malifedha Mashali alisema kuwa mwili wa mtoto wake huyo aliyeuawa kwa kupigwa na watu wasiojulikana, utazikwa katika makaburi ya Kinondoni Mwembejini.
Alisema mipango mingine ya mahali utakapoagiwa mwili huo na utakapoombewa, bado ilikuwa inaendelea na alikuwa hajajua shughuli hizo zitafanyikia wapi.
Mzee Mashali alisema kuwa mwili wa mtoto wake utaagwa katika viwanja vya Leaders Club Kinondoni kuanzia saa 4:30 asubuhi kabla ya kwenda kulazwa katika nyumba yake ya mileleni katika makaburi ya Kinondoni mapema mchana.
Mashali alikuwa akishikilia mikanda ya WBO na UBO kabla ya kifo chake, ambapo amekufa huku akiacha mataji kibao ya ngumi ya hapa nchini na yale ya kimataifa.
Wadau wengi wa michezo walitoa masikitiko yao kuhusu kifo hicho cha Mashali huku wengi wao wakisema kuwa bondia huyo alikuwa na kipaji cha aina yake katika ndondi.
Mashali alizaliwa Dar es Salaam mwaka 1989 na alianza kupigana ngumi za kulipwa Novemba 27, 2009 alipopigana na kumtwanga Hamadu Mwalimu katika pambano lililofanyika katika ukumbi wa Texas, Manzese

Read More

MNH wakusanya bil 4.6/- kwa mwezi

HOSPITALI ya Taifa Muhimbili (MNH) imekuwa ikikusanya mapato ya Sh bilioni 4.6 kwa mwezi kuanzia Desemba mwaka jana hadi kufikia Oktoba mwaka huu, ikiwa ni ongezeko la asilimia 100.
Fedha ni zaidi ya wastani wa Sh bilioni 2.3 ilizokuwa ikizalishwa na hospitali hiyo kwa kipindi kama hicho kuanzia Dasemba 2014 hadi Oktoba 2015.
Sambamba na ongezeko hilo, pia huduma za vipimo vya MRI, CT –Scan, X-Ray na Ultra Sound zimeongezeka ambapo katika kipindi cha mwaka mmoja sasa, jumla ya wagonjwa waliopimwa kwa kutumia vipimo hivyo wamefikia 55,073 ukilinganisha na kipindi kama mwaka uliopita ambapo wagonjwa waliopimwa walikuwa 23,989.
Akitoa taarifa ya mafanikio ya mwaka mmoja madarakani ya Serikali ya Awamu ya Tano jana jijini Dar es Salaam, Mkuu wa Kitengo cha Mawasiliano ya Umma cha hospitali hiyo, Aminiel Eligaesha alisema hivi sasa mwelekeo wa mapato ya MNH kuanzia Julai 2016 hadi Oktoba 2016 unaonesha hospitali hiyo imezalisha Sh bilioni 4.6 kwa mwezi na kusema hayo ni mafanikio makubwa kuwahi kupatikana katika kipindi kifupi cha miezi miwili.
“Tumeona hospitali ina fursa ya kuzalisha kiasi kingi cha fedha na hivyo kuweza kujitosheleza kwa kiwango kikubwa katika uendeshaji wa shughuli zake kutokana na mwelekeo wa mapato yalivyo,” alisema Eligaesha.
Alisema mafanikio hayo yamechangiwa na uboreshwaji wa huduma hospitalini hapo pamoja na kazi ya usimamizi wa wafanyakazi na kupunguza kero za wafanyakazi hospitali hapo kwa sababu wameongeza morali ya kazi hasa baada ya kero na matatizo yao kupatiwa ufumbuzi.
Aliyataja maboresho hayo kuwa ni kuunganisha mashine za CT Scan, X-Ray na MRI katika mtandao wa Tehama katika kuhakikisha huduma zote zinazofanyika katika idara hiyo zinaonekana.
Aidha, pia kupata idadi ya wagonjwa waliofanya vipimo na kulinganisha kiasi cha mapato kilichokusanywa kama kinaendana na picha zilizofanyika kwenye mashine hizo.
Akizungumzia huduma za vipimo vya MRI, Eligaesha alisema Novemba 9, mwaka jana ikiwa ni siku nne baada ya Rais John Magufuli kuapishwa, alifanya ziara katika hospitali hiyo na kukutana na changamoto ikiwemo kuharibika kwa MRI na mashine nyingine za X-Ray na kutoa maagizo kwa uongozi wa hospitali kuhakikisha mashine hizo zinatengenezwa ndani ya siku 14.
Alisema maagizo hayo yalitekelezwa na hivi sasa mashine zote zinafanya kazi vizuri na kwa kipindi cha Desemba 2015 hadi Oktoba 25,mwaka huu jumla ya wagonjwa 17,951 wamepimwa kwa kutumia mashine ya MRI, ukilinganisha na wagonjwa 1,911 waliopima kwa kipindi cha Desemba 2014 hadi Oktoba 2015.
Akizungumzia huduma ya CTScan, Eligaesha alisema masheni hiyo ilitengenezwa na hivi sasa inaendelea kufanya kazi vizuri ambapo kwa kipindi cha Desemba 2015 hadi Oktoba 2016 wagonjwa 10,259 wamepimwa ukilinganisha na wagonjwa 3,319 waliopimwa Desemba 2014 hadi Oktoba 2015.
Kuhusu upatikanaji wa dawa, alisema wagonjwa wanapata dawa za zaidi ya asilimia 96 kutoka kwenye maduka ya dawa ya hospitalini na kuwa wameboresha mfumo wa Tehama kwenye utoaji na uagizaji dawa.

Read More

Serikali kutumia trilioni 32.9/- mwaka 2017/2018

SERIKALI imepanga kutumia Sh trilioni 32.946 katika bajeti yake ya mwaka 2017/2018, ikiwa imeongezeka kutoka Sh trilioni 29.5 ya mwaka 2016/2017 na kutaja maeneo ya kipaumbele kuwa ni pamoja na kuzingatia miradi ya kufufua kiwanda cha General Tyre cha Arusha na kuendeleza maeneo ya viwanda vidogo.
Sambamba na hilo, serikali imebainisha mikakati yake ya kudhibiti matumizi, ambapo sasa itahakikisha mikataba inayoingiwa na serikali na taasisi zake inakuwa katika shilingi za Tanzania, isipokuwa kwa mikataba inayohusisha biashara za kimataifa.
Kuhusu kuhamishia shughuli za makao makuu ya serikali Dodoma, mipango ya ujenzi wa majengo na miundombinu yote ya serikali iliyopangwa kujengwa Dar es Salaam, itahamishiwa Dodoma.
Akiwasilisha bungeni jana mapendekezo ya Mpango wa Maendeleo wa Taifa kwa mwaka 2017/2018 na mwongozo wa kuandaa mpango na bajeti ya serikali kwa mwaka 2017/2018, Waziri wa Fedha na Mipango, Dk Philip Mpango alisema kati ya Sh trilioni 32.946, Sh trilioni 19.782 zitatengwa kwa ajili ya matumizi ya kawaida.
“Sh trilioni 7.206 ni kwa ajili ya mishahara ya watumishi wa serikali na taasisi za umma na Sh trilioni 9.723 ni kwa ajili ya kulipia deni la Taifa lililoiva. Matumizi ya maendeleo yatakuwa Sh trilioni 13.164 sawa na asilimia 40 ya bajeti yote ambapo fedha za ndani ni Sh 9.960 sawa na asilimia 76. Kiwango hiki ni ongezeko la Sh trilioni 1.343 ikilinganishwa na mwaka 2016/2017,” alifafanua.
Alisema mapato ya ndani yanatarajiwa kuwa Sh trilioni 20.872 sawa na asilimia 63 ya mahitaji yote.
Kati ya mapato hayo serikali inatarajia kukusanya mapato ya kodi ya Sh trilioni 18.097 sawa na asilimia 87 ya mapato ya ndani.
Hata hivyo, alisema kiasi hicho ni makisio ya awali ambapo makisio ya mwisho yatapatikana baada ya kukamilika kwa tathmini ya nusu mwaka 2016/2017 pamoja na taarifa ya kikosi kazi cha maboresho ya kodi, kinachojumuisha wadau mbalimbali wakiwemo sekta binafsi na washirika wa maendeleo.
Akizungumzia jinsi ya kudhibiti matumizi ya serikali, Dk Mpango alisema serikali itaendelea kupunguza gharama na matumizi yasiyokuwa ya lazima ikiwemo sherehe za kitaifa, posho za vikao, uchapishaji wa fulana, kofia, mikoba, safari za nje, mafunzo ya muda mfupi nje nchi na ununuzi wa samani kutoka nje.
Pia kutoa kipaumbele kwa taasisi za umma na zile ambazo serikali inamiliki hisa katika kununua huduma kama vile bima, huduma za fedha, usafirishaji wa barua, wavuti, simu, mizigo na vifurushi, matangazo na usafiri.
Waziri alitaja mikakati mingine ni kudhibiti utoaji wa mikopo kwa wanafunzi wa Vyuo vikuu kwa kuhakikisha kuwa wanafunzi waliokidhi vigezo pekee ndio wananufaika na mikopo hiyo na kudhibiti ulipaji mishahara kwa watumishi wanaostahili pekee.
Vilevile kutumia utaratibu wa ununuzi wa nyumba kwa utaratibu wa kulipia kwa awamu hususan kwa majengo ya balozi na wawakilishi walioko nje ya nchi, badala ya kupanga na kudhibiti safari za nje ya nchi na ukubwa wa misafara.
Katika kufanikisha ukusanyaji mapato, waziri huyo aliwataka maofisa masuuli wote nchini kuweka mazingira wezeshi katika kufanikisha hilo kwa kuingia mikataba na wazabuni na makandarasi na watoa huduma wanaotumia mashine za kielektroniki za kutoa risiti (EFDs) na kuimarisha ukaguzi na usimamizi wa vituo vya ukusanyaji mapato kama bandari, mipakani na viwanja vya ndege.
Dk Mpango alisema maofisa hao, pia wanaagizwa kufanya mapitio ya mikataba yote iliyopewa misamaha ya kodi ili kutathmini faida zake na kujipanga upya, ambapo pia kutoingia mikataba inayohusisha misamaha ya kodi bila idhini ya Waziri wa Fedha na Mipango.
Baadhi ya maeneo ya vipaumbele vya bajeti ya mwaka 2017/2018 alivyotaja Dk Mpango ni miradi ya kukuza viwanda na uchumi ikiwamo miradi ya magadi Soda kwenye bonde la Engaruka, kukifufua kiwanda cha General Tyre, uendelezaji wa eneo la viwanda vidogo(Sido) katika mikoa ya Morogoro, Dar es Salaam, Mbeya, Mwanza na Arusha.
Pia bandari kavu mkoani Pwani, bomba la mafuta kutoka Uganda hadi bandari ya Tanga pamoja na mradi ya makaa ya mawe Mchuchuma, chuma cha Liganga na ujenzi wa Reli ya Kati kutoka Dar es Salaam –Tabora- Kigoma kwa standard gauge na matawi yake.

Read More

Vyuo vikuu 15 kitanzini

SERIKALI imetoa siku mbili kwa vyuo vikuu 15, kuwasilisha matokeo ya mitihani kwa mwaka wa masomo 2015/2016 ya wanafunzi wanufaika na mikopo wanaoendelea na masomo ili kupangiwa mikopo kwa mwaka wa 2016/2017.
Vyuo hivyo vilivyokuwa viwasilishe matokeo hayo siku 30 kabla ya kufunguliwa, vimepewa siku hizo kuanzia jana, kabla serikali haijachukua hatua zozote.
Katibu Mkuu wa Wizara ya Elimu, Sayansi, Teknolojia na Mafunzo ya Ufundi, Maimuna Tarishi alisema hayo jana, alipotembelea ofisi za Bodi ya Mikopo kwa Wanafunzi wa Elimu ya Juu.
Alisema serikali iko katika hatua za mwisho za upangaji na utoaji wa mikopo kwa wanafunzi wanaoendelea na masomo.
Tarishi alisema baadhi ya vyuo vimeshindwa kuwasilisha matokeo ya mitihani kwa wanafunzi wanaoendelea ili wapangiwe mikopo kwa mwaka unaoendelea, kwani utaratibu lazima vyuo kuwasilisha matokeo kuonesha wanafunzi wangapi wana sifa za kuendelea kupewa mikopo.
“Mikopo haiwezi kutolewa tu kwa kila mwanafunzi, hata kama ameamua kuacha masomo, hivyo vyuo vina wajibu wa kuthibitisha kuwa wanafunzi wanaowaleta bado ni wanafunzi sahihi na wanaendelea na masomo,” alisema Katibu Mkuu huyo.
Alivitaja vyuo ambavyo havijawasilisha matokeo hayo kuwa ni Vyuo vya Elimu ya Biashara (CBE) Dar es Salaam, Mwanza na Dodoma, Chuo Kikuu cha Bagamoyo (UOB), Chuo Kikuu cha St. John Kituo cha St Mark Dar es Salaam (SJUTDSM), Chuo cha St. John Tanzania (SJUT) na Chuo Kikuu cha Tumaini Mbeya (TUMAMBEYA).
Vingine ni Chuo cha Maendeleo ya Jamii (CDTI), Chuo cha United African University of Tanzania (UAUT), Chuo Kikuu cha Teofilo Kisanji (TEKU), Chuo Kikuu Cha Kumbukumbu ya Hubert Kairuki (HKMU), Chuo Kikuu cha Mtakatifu Joseph cha Tiba ya Sayansi (STJCAHS), Chuo Kikuu cha Mtakatifu Joseph Kituo cha Makambako na Chuo Kikuu cha Zanzibar (ZU).
Katibu Mkuu huyo pia alitaka vyuo hivyo kuimarisha mifumo yao ya kuandaa na kuwasilisha matokeo ya mitihani kwa wakati na kwa ukamilifu katika siku zijazo ili kuondoa usumbufu. Akizungumzia hatua watakazochukua wasipotimiza agizo hilo, alisema wanawaagiza kutekeleza maagizo hayo kwa siku walizopewa.
Alisema ana uhakika kauli hiyo inawatosha waungwana hao, kutimiza wajibu wao.
Awali vyuo vyote vya elimu ya juu, vilikumbushwa umuhimu wa kuwasilisha matokeo, kabla havijafunguliwa, ikiwemo serikali kufanya mkutano na Makamu Wakuu wa vyuo vyote vya elimu ya juu mkoani Dodoma na kusisitiza umuhimu wa vyuo kuwasilisha matokeo na nyaraka nyingine muhimu, kabla ya vyuo kufunguliwa.
Alisema Serikali ya Awamu ya Tano, imejipanga kikamilifu na imetenga fedha za kutosha na tayari imetoa Sh bilioni 80.89 kwa ajili ya mikopo ya wanafunzi, wanaonufaika na mikopo hiyo kwa robo ya kwanza ya mwaka.
Alisema kati ya kiasi hicho, tayari Sh bilioni 45.2 zimekwishalipwa na kiasi kilichosalia, kitalipwa kwa vyuo baada ya kupokea matokeo kikamilifu. Pia aliwatoa wasiwasi wanafunzi wa mwaka wa kwanza waliokosa mikopo, kupeleka malalamiko katika dirisha maalum la malalamiko, lililofunguliwa na Bodi ya Mikopo kuanzia juzi na serikali ni sikivu, itafanyia kazi.
Katika siku za hivi karibuni, wanafunzi wa elimu ya juu katika vyuo mbalimbali wanaoendelea na masomo, wamekuwa wakilalamika kucheleweshwa kwa mikopo ya elimu ya juu ; huku wanaoanza mwaka wa kwanza, wakilalamikia kukosa mikopo hiyo.
Imeelezwa kuwa baada ya kufanyika uchambuzi, wanafunzi 20,183 wanaoanza mwaka wa kwanza katika vyuo mbalimbali wamepatiwa mikopo; huku wakitarajia kutoa mikopo kwa wanafunzi 93,295 wanaoendelea na masomo.
Katika hatua nyingine, Waziri wa Nchi, Ofisi ya Waziri Mkuu, Sera, Bunge, Ajira, Kazi, Vijana na Walemavu, Jenista Mhagama amesema serikali kwa sasa inaandaa taarifa kuhusu mikopo ya wanafunzi wa elimu ya juu; na ikishakamilika itawasilisha bungeni, kama walivyoomba wabunge.
Alitoa ufafanuzi huo baada ya Mwenyekiti wa Bunge, Najma Giga kujibu mwongozo uliotolewa na Mbunge wa Mwibara, Kange Lugola (CCM) kuomba mwongozo bungeni, akitaka leo serikali ilete taarifa kuhusu mikopo inayotolewa na Bodi ya Mikopo, kwa kile alichoeleza kuwa wanafunzi wengi walioomba mikopo wakiwa na vigezo, hawajapata. Jenista alisema kwa sasa serikali inaandaa taarifa hiyo na ikikamilika, italetwa bungeni kama wabunge walivyoomba.
Akiwasilisha Mapendekezo ya Mpango wa Maendeleo ya Taifa unaokusudiwa kutekelezwa na serikali pamoja na mwongozo wa kuandaa mpango na bajeti ya serikali kwa mwaka wa fedha 2017/18, Waziri wa Fedha na Mipango, Dk Philip Mpango alisema Serikali itadhibiti utoaji wa mikopo kwa wanafunzi wa vyuo vikuu, kwa kuhakikisha kuwa wanafunzi waliokidhi vigezo pekee, ndio wananufaika kwa mikopo hiyo.
Awali, Mhagama alisema serikali haifanyi kazi kwa miujiza, bali kwa kutumia mgangilio wa bajeti iliyowekwa na uthibitisho kwamba serikali inafanya kazi kwa mipango, imeweza kutekeleza kutoa elimu bure ikiwa ni utekelezaji wa Ilani ya CCM.
Mhagama alitoa kauli hiyo baada ya Kiongozi wa Kambi ya Upinzani Bungeni na Mbunge wa Hai, Free Mbowe (Chadema) kuuliza swali la nyongeza lililotokana na swali la msingi la Mbunge wa Shinyanga Mjini, Stephen Masele (CCM) kutaka kujua Serikali itaanza kutekeleza lini ahadi ya Sh milioni 50 kwa kila kijiji na mtaa ili kutatua tatizo la ajira na mitaji kwa vijana na akina mama.
Akifafanua zaidi, alisema kamwe serikali haijiendeshi kwa miujiza bali kwa kutumia mipango iliyojiwekea katika bajeti zake.
“Kuthibitisha jambo hili linatekelezeka, Serikali ya CCM kupitia Ilani yake tumeweza kutoa elimu bure, kuwashangaza Watanzania miradi mikubwa mbalimbali imetekelezwa ikiwemo kununua ndege (mbili za Dash 8, Q400 zilizotengenezwa na Bombardier), Ilani inatekelezwa kwa mambo mengi mbalimbali,” alisema akimjibu swali la nyongeza Mbunge wa Hai, Freeman Mbowe (Chadema) kuhusu Sh milioni 50 zilizoahidiwa kwa kila kijiji nchini.
Jenista alisema fedha zote zinazoahidiwa na serikali zikiwemo Sh milioni 50, zitatolewa na Watanzania watazipata.

Read More